金亞淶泰國餐廳

營業中

休息中

最近去咗荔枝角「金亞淶泰國餐廳」食飯，Staff好好人，好有耐性，而且餐廳於工作天無收取加一服務費，晚市Order飲品仲有八折優惠。泰式火山排骨（單點$168），好巨型，上菜時有連火爐一齊上枱，保證一直食都係熱辣辣嘅，表面鋪滿芫荽、泰式酸辣汁，排骨口感嫩滑、腍身，肉質肥瘦適中，已經煮到骨肉分離，食落啖啖肉，加上充滿醬汁味道，食落好惹味。泰式金鑽鮮菠蘿沙律（單點$68），表面鋪滿芝麻小魚乾、炸乾蔥，菠蘿食落好Juicy，內有洋蔥、香蔥。4串燒魷魚（單點$58），魷魚肉質厚身，口感彈牙，配以燒汁食用，食落好香口。椰皇三重奏（單點$42），第一層係焗椰子片碎，口感香脆，第二層係椰子汁奶凍，食落入口即化，椰子汁味道濃郁，第三層係椰青水啫喱，口感滑溜，味道清甜，整體口感、味道都好豐富，略嫌焗椰子片碎比較少。金鑽鮮菠蘿冰（跟餐$20），表面鋪滿菠蘿粒，味道香甜，飲落好清爽。熱泰式青檸蜂蜜（跟餐$20），味道酸甜。