今晚挑起條筋想食燒肉，第一時間就諗起安平燒肉，佢嘅【120分鐘日本A4+和牛饗宴】放題，真係CP值極高，加上地方寬敞舒適，我特別鍾意。
一坐低店員就送上【安平慢熬清雞湯】，用個好靚嘅壺裝住，浸出嚟係熱辣辣嘅雞湯，秋冬天氣涼飲就好窩心，仲有得無限refill添。
我鍾意安平燒肉嘅其中一個理由就係佢有超多款醬汁可供配搭，最特別有招牌黃金醬、薑味可樂醬、香水檸檬汁、海鮮五味醬、香辣烤肉辣椒粉，另外仲有蒜味鹽醬、極上醬油、沙茶醬、台灣甜辣醬、手切蒜片、安平辣椒醬、泰式海鮮醬、椒麻口水醬、柚子醬、鹽蔥醬、芥末⋯⋯梗有幾款啱食～
要回本就狂食牛啦。【A4+和牛】同【日本A4+和牛壽喜燒】啦。雪花紋靚到藝術品咁，烤肉放上鐵板燒幾秒已經爆油，壽喜燒就蘸蛋汁超滑溜，各有特色，入口即溶好治癒。【日本A4+醬燒一口和牛丁】就粒粒都厚，口感一流成落juicy，【澳洲M8和牛肩胛】就油脂少啲但肉味豐富，鍾意濃郁肉味就啱晒。
今次最有儀式感嘅係【極•厚切檸檬牛舌】，先用沙漏計時，每邊煎2分鐘，然後擺上木製托盤，擠啲檸檬汁，再用刀叉切，爽口、juicy、肉香十足，配檸檬汁又帶點清新，讚！
海鮮亦係另一主角。【柚子鮑魚酥】、【威士忌釀鮑魚】一款酸甜，一款咸香，鮑魚好厚肉，食落彈牙又 juicy；【炙烤霸王蝦】已經開邊，唔駛剝殼食得方便，蝦肉新鮮，燒完唔會乾，黑蒜油、鹽葱各有風味；【黃油蒜烤帆立貝】黃油帶子烤好已經香噴噴，鮮甜又惹味；【炙烤生蠔】大大隻；【炙烤白鱔】皮脆肉爽口，用紫菜包住食，一流！仲有【安平赤魚一夜干】等等，同樣係回本之選。
【安平櫻花蝦飯】係安平燒肉嘅另一特色。用櫻花蝦、香蔥、海苔或秘製滷水汁配搭出啱自口味嘅拌飯。
甜品都有得燒，【火燒布朗尼】外層微微焦香，入口係暖暖嘅濃厚朱古力味。另一台式甜品【安平仙草芋圓】仙草滑到似啫喱咁融開，味道新。芋圓煙韌有咬口，甜度剛剛好。
店員話成為會員「愈燒愈抵食」！包括每月同生日優惠，仲有「積分狂賞日」等。
今晚係真心滿足，和牛同海鮮兩樣都無得輸。
