三文魚子海膽杯 $238 杯裝賣相精緻夠新鮮！😍滿滿三文魚子、三文魚同海膽，入口鮮甜爆汁，帶陣鮮味，特別海膽唔腥！底層有少少壽司飯增添口感層次。
海之幸Taco $78 幾有創意，Taco外層當係紫菜天婦羅脆卜卜（冇油益味），內餡有呑拿魚蓉、海膽同三文魚子，仲有小花點綴，配上特有嘅海鮮醬汁，帶點微辣同海鮮鮮味，食落幾唔錯。因為有飯，雖然外型迷你，但都有啲飽～
國產和牛他他Taco $78 呢個係男友order, 佢覺得生和牛肉質都嫩滑，容易咬斷。配上日式醬油，帶點鹹香同牛肉嘅油脂香。size就唔夠佢食啦，但淺嚐好ok🤓
芝士醬厚燒玉子 $98 芝士即場燒，玉子真係厚，有蛋香，甜鹹交錯，正☺️
吉列童星蝦（兩隻）回憶 $68 唔使講都夠特別啦，點解可以諗到童星點心麵可以配炸蝦食？🤣 童星點心麵好似變咗天婦羅蝦嘅外層，好脆，蝦肉都彈牙，配埋沙律醬一齊食最match ！
串燒套餐優惠 $188（每晚8:15後供應，限量，訂座時記得早一日確認） 平咗成$100，仲送嘢飲喎，梗係要嗌啦！
有豚肉菜卷、鹽燒雞皮、燒雞羽、燒雞腎、牛油粟米同埋自家製雞軟骨棒。佢係最遲上，我估真係即燒即上，所以整體都真係好出色，好惹味！特別雞軟骨棒加埋生雞蛋醬油，好好咬口！粟米燒到粒粒分明，超鍾意！雞皮雞翼豚肉都好夠味又香，係雞腎硬咗少少，不過咬落又ok
自家製檸檬燒酎 （串燒套餐優惠） 檸檬燒酎幾清新。苦苦地得黎又有啲檸檬嘅清爽咁，幾開胃。鍾意啤一啤都不妨揀呢個串燒餐～
巨峰梳打 $52 清涼爽口，葡萄味濃郁又夠甜，氣泡感好解渴。
賣點：食物質素高、環境有feel、店員有善、openrice訂座有優惠
串燒要啲時間等，但好味
好味度：8.6/10
