黑窗里

營業中

休息中

深水埗長沙灣一帶愈開愈多文青 cafe，早排做完嘢就去咗其中一間食素嘅，個名幾特別，叫黑窗里，間舖嘅前身，就係頗具盛名嘅蘇波榮。呢度嘅 menu 日日轉，主菜每日只有三個選擇，其中一款係自由定價，概念好獨特。我揀咗烤鮮蔬佐椰子芋泥滷肉燥飯，加廿八蚊配埋湯同小食，湯係素純西蘭椰菜花堅果忌廉湯，唔算好 creamy，但椰菜花同堅果味幾突出，ok 好飲。小食二選一，我就揀咗昆布醬煮南瓜，呢個真心正，甜味嘅日本南瓜同鹹味嘅昆布汁，好夾，好食。主菜賣相好靚，我好鍾意呢啲素滷肉，應該部份係菇類，幾香，有咬口；另外個汁椰子同芋頭味濃郁，甜甜哋，餸飯一流；配埋小蕃茄同南瓜片等，成個飯都算豐富，食完有飽肚嘅感覺。最後嚟杯酸酸哋嘅紫蘇薄荷 Lemonade，邊飲邊睇店入面嘅藏書，又係 一個好 chill 嘅黃昏😚。