愛麗絲的秘密花園

愛麗絲的秘密花園最大賣點肯定係 cafe 嘅環境，大至整體裝修格局，細如杯杯碟碟枱枱櫈櫈，全部都同愛麗絲夢遊仙境有關，仲有動畫無限 loop，老闆肯定係 big fans。

午餐嘅大蝦意粉可揀茄汁或青醬，作為青醬控嘅我當然選擇後者。意粉都幾大碟，蝦嘅數量都唔少，意粉煮得算 al dente，調味亦唔錯，不過青醬味稍為弱咗少少。加五蚊配杯 Matcha Latte，呢個真係幾有趣，同我哋平時飲開嘅好唔同，上枱時係一杯用抹茶粉沖嘅好濃嘅抹茶，同埋一杯鮮奶，自己溝，濃淡自己話事，其實咪就係杯有抹茶有鮮奶嘅飲品囉😂。