麻甩爐海鮮雞煲私房菜 (安樂樓 (已結業)

今日中午喺大埔返工， 路過呢一邊， 見到呢間雞煲一直都有開咗喺度， 但未試過食。 原來佢連中午都有做， 價錢又幾合理， 50蚊左右一個餐， 於是就入去試下。小店卡位都坐得幾舒服， 如果夜晚一班人嚟打邊爐都幾開心㗎。今日我就試食咗呢個藥膳雞 湯烏冬， 單係睇個湯已經算唔錯， 藥材味唔係話非常之濃， 唔會話好有苦澀味， 從佢見到啲雞油浮喺面， 仲有湯底嘅顏色， 就知道係要係用心用時間去煲，先做得到。另外成碗麵仲有好多大大嚿嘅雞， 啲雞煮得好冧， 唔會話有雪味， 茶記嘅格局做到咁嘅 藥膳菜色，算係做得幾好。希望下次有機會嚟食打邊爐， 試埋佢哋啲雞煲， 一個簡單嘅午餐都做得咁好， 夜晚打邊爐嘅雞煲一定係高水準， 期待。