主角日本A4+黑毛和牛，油花分布靚到好似藝術品，輕輕一淥入口即溶，牛味香濃！伊比利亞黑毛豬梅肉都係驚喜之作，肉香十足。另外，餐廳仲好好客咁送咗澳洲M9和牛牛丸（彈牙爆汁！）同海鮮拼盤，任食鮑魚非常鮮甜，絕對係誠意之作。
今次試咗期間限定嘅「聰明魷魚沙茶鍋」，沙茶味香濃得嚟唔會過鹹，裡面仲有爽口魷魚，未打邊爐先飲咗兩碗湯！另一個湯底可以自由配搭鴛鴦鍋，非常貼心。
小食方面絕對係另一個胃！蝦蝦霸霸脆多士造型可愛，蝦膠彈牙；日本和牛橘梨伴豆腐清新解膩，和牛他他配豆腐口感層次豐富；仲有充滿港式情懷嘅阿嬷豆乾魚蓉麵，用咗老字號「永樂粉麵廠」嘅麵，食落特別有風味。
飲品推薦芒檸蜜西米爽，酸甜清爽，同火鍋係絕配！甜品蜜桃愛玉冰為呢餐作結，愛玉QQ彈彈，蜜桃香甜，完美！
