泰屋

營業中

休息中

今日又去左726去食野，今日揀左間泰菜。呢間泰菜位於２樓，因為太多人等lift，所以我決定行樓梯，不過我唔建議大家行上去，條樓梯勁臭。媽媽叫左佢最愛既椰青，而我叫左椰汁紅豆冰。椰青好清甜，媽媽超讚。紅豆冰好香椰汁味，不過紅豆就麻麻。當椰汁冰咁飲都好好味。第一個到既係馬拉盞炒通菜，通菜鮮嫩可口。味道比一般既馬拉盞炒通菜辣，如果比較怕辣既人未必食到。不過我喜歡食辣，所以我會覺得十分惹味。然後有炭燒扇貝，原本我好期待的。可惜扇貝上舖滿了我討厭的薑，係勁多薑（初初仲以為係蒜）。扇貝味道普通，無乜鮮甜味。爸爸最愛的冬陰公，味道不錯，有不少既海鮮，唯不夠新鮮。咖哩牛尾都幾好，牛尾炆得好腍又唔膻。呢個油酥餅點咖哩超好味，不過就油左少少。芝士烤包我本身好期待，但係最後好失望，芝士包完全食唔到有芝士味。不過個包本身都唔差既。最後有最好味既原個菠蘿海鮮炒飯，賣相吸引不在話下，食落都好讚架。有好多海鮮而且都算鮮，飯唔會太硬又唔會太腍。成個配搭得好好。整體而言，如果要係旺角食泰菜，呢間都係一個唔錯既選擇，因為環境都幾好，岩哂同一班親戚朋友飯聚。