泰鳩

營業中

休息中

一早已經聽過隊長佢哋三兄弟開咗間泰國餐廳，上星期終於有機會去旺角試一試，原來餐廳喺油麻地站比較近啲，我哋一上到去竟然見到幾隻好可愛嘅狗狗，原來呢度歡迎寵物，感覺特別親切。去泰國餐廳梗係要食炭燒豬頸肉啦，份量好足好大份，食入口好爽口，點埋泰式辣汁特別開胃。主菜我哋叫咗咖哩大頭蝦加薄餅，一上枱已經聞到好濃烈嘅咖喱味，雖然我覺得唔夠辣，不過真係好香，大頭蝦真係好大隻而且有羔，咖喱汁點埋新鮮香脆嘅薄餅一齊食，真係非常好食。另外冬陰功湯就飲得多，冬陰功用嚟煮魚真係第一次試，原來味道好夾，而且好濃郁，條魚亦都好滑，忍唔住叫咗個白飯嚟送，真係做得非常出色，我覺得絕對要試。啲人成日話明星店好睇唔好食，但我肯定呢間唔係，因為真心好食，不過而家今時今日嘅食肆都要大家多多支持先可以保留住，隊長繼續加油。