巧得鍋

雖然呢排天氣咁熱，但係突然興起想食冬天必備嘅雞煲，所以去咗觀塘呢間巧得鍋，舖頭位置隱蔽，唔係咁容易搵到，但係絕對值得一試。前菜有蒜蓉芝麻蓮藕，小小麻辣，食落爽口，非常開胃，去到就得不及待叫咗個雞煲，佢哋午市有雞煲套餐，晚市就更加特別，有唔同配菜嘅雞煲，有鮑魚、牛雜、或者花膠雞煲。午市套餐有蕎麥茶，仲包娃娃菜同兩碗白飯，非常抵食。平時食雞煲就會想快啲食完加湯打邊爐，但係呢度就可以focus返喺雞煲，雖然食法，唔同但係一樣咁滋味。雞煲可以揀辣嘅程度，我哋就揀咗小辣，食得出佢哋有花椒八角，惹味得嚟唔會太刺激。雞肉都非常嫩口，仲好juicy，配菜加咗紅椒黃椒，望落好吸引。我哋叫咗魚湯浸娃娃菜，可以幫助減低罪惡感，而且菜都好鮮嫩。食到辣辣地，叫咗杯菠蘿沙冰同熱情果沙冰。菠蘿沙冰好香菠蘿味，飲落甜甜地。熱情果沙冰就比菠蘿味酸少少，非常好飲，兩杯都解辣一流。