鐵牛台灣牛肉麵 (希爾頓大廈)

營業中

休息中

鐵牛出開尖咀想食台灣野，同事推鐵牛所以試試，見到臭臭鍋同鴨血就覺得好吸引！除左必叫既台灣腸同牛三寶，仲同朋友分別叫左麻辣同牛奶鍋，貪心嘅我梗係配埋一試便知高與低既滷肉飯啦～台灣腸嘅蒜頭片分量都多，一啖一個勁滿足，牛三寶水平達標不過不失。至於主角臭臭鍋，啱啱上嘅時候冇為意，點知滾起一撈底發覺原來勁多料，除咗常見嘅鴨血，仲有我最愛嘅蜂巢豆腐，豬血糕，蟹柳等等，作為台灣臭臭鍋來講我覺得好有誠意。我另外仲加咗芋頭丸，芋頭蓉十足，淨係食餸都夠晒飽。至於滷肉飯係期待以上，肉汁勁惹味，撈飯簡直一流。至於朋友嘅牛奶鍋，我都偷食左幾啖，如果本身鍾意芝士同奶味嘅朋友可以一試，奶味濃郁而且芝士拉曬絲，不過要小心唔留神會痴底。另外野飲好大杯，我哋叫咗凍既冬瓜茶同百香果QQ，兩杯味道都唔錯，百香果QQ每啖都係滿滿既配料。我覺得喺尖沙咀地區嘅台灣菜來講，呢一間性價比頗高，而且午餐來講都幾優惠，下次經開不妨一試。