Plato Cafe & Bistro (彌敦道) (已結業)

今日有好消息宣佈，所以放工就搵咗老公拍下拖撐吓枱腳，就喺佢公司附近嘅Plato Cafe & Bistro食個晚餐。我哋最鍾意唔用腦諗嘢，所以就叫咗二人套餐，貪方便又有齊晒頭盤至甜品，睇落都幾抵食。套餐已經包括咗餐包及餐湯，餐包有翻熱，搽牛油軟綿綿十分正，而本身嘅餐湯係蘑菇湯，啖啖有蘑菇蓉，非常足料。另外加$38可以升級轉為法式龍蝦湯，龍蝦湯非常香濃，賣相幾吸引。頭盤有三款菜式可供選擇，我哋就揀咗芝士菠菜酥皮盒，脆脆嘅酥皮盛載住忌廉芝士菠菜，旁邊仲有黑醋沙律菜伴碟，幾好味又開胃。炭燒美國安格斯肉眼牛扒牛扒都幾大塊，擺盤亦都幾靚。牛扒火候都控制得好好，外面有炭燒嘅香味，而入面亦都唔會過熟。牛扒下面仲有唔同嘅蔬菜，包括有茄子、翠玉瓜、西蘭花、薯蓉等，茄子同翠玉瓜仲係經過燒烤製作而成，係誠意之作。另外仲揀咗西班牙海鮮飯，海鮮包括有青口、魷魚圈、大蝦同帶子，呢個西班牙飯相對就比較多汁，可以話係Risotto嘅混合體。二人套餐中包括甜品，可以自選哈根大師雪糕或者芝士餅。芝士餅份量適中，唔會太甜太油膩。餐飲就揀咗熱伯爵茶&檸檬茶，茶味夠香濃。