丼丼屋 (創紀之城五期(apm))

營業中

休息中

同老公放工後去咗食呢間，貪佢坐得舒服、價錢唔算太貴同味道有保證，都叫冇失望。🍓名古屋鳥開親子丼套餐　　簡單嚟講只係雞肉加雞蛋，點解賣咁貴？首先佢除咗有我哋一貫認知嘅材料滑蛋，仲多咗隻生雞蛋。呢隻生雞蛋不得了，蛋味濃得很，又夠「漿」，好有質感；另外佢啲雞肉係名古屋純種地雞（日本三大名種地雞之一），咬落口除咗好有雞味，仲好彈牙同唔黐牙！飯嘅份量超多，絕對唔會話食完好似食咗空氣咁。跟餐味噌湯：Standard跟餐紫薯蓉：老公話好難食，個味好古怪。跟餐蜂蜜綠茶：好清爽，蜂蜜味好減壓，正！跟餐甜品：黑糖水信玄餅，個黑糖汁好好味，又有啲咬口兼唔會過甜，好適合夏天食。🍓滑蛋吉列豬扒丼套餐（呢個套餐冇紫薯）雖然係滑蛋炸豬扒，但豬扒仍能保持香脆，不俗。敗筆是米飯，縱然吃得出是日本米，但感覺煮得不好，米飯都黏在一起。