泰然 (長發廣場)

營業中

休息中

時不時就會想食泰菜，不過青衣呢頭食物選擇本身已經唔多，如果泰菜嘅選擇就更加少，青衣城嘅泰菜餐廳都已經食過唔少次，見呢間餐廳有唔少好評，今日就行遠少少去長發村嗰邊揾食~ 估唔到係平日嘅夜晚七點幾，餐廳都幾多客，我諗味道應該唔錯~ 有樣嘢令我好驚喜嘅係，呢度居然有火山排骨，自從之前去泰國夜市食完之後就念念不忘，酸酸辣辣又啖啖肉好啱我口味最開心嘅係，二人餐都可以叫火山排骨，我地一行二人二話不説就揀咗火山排骨，明爐大蜆煲同蟹肉炒飯(太肚餓唔記得影低)呢度上菜神速，落咗單唔夠5分鐘已經嚟齊晒所有嘢，抵讚~ 食物方面，呢度嘅火山排骨用乾冰上，打咭效果一流，味道亦一啲都唔輸蝕俾泰國~ 可能為咗配合香港人嘅口味，我哋雖然冇特別叫小辣，但係辣度明顯比泰國食嘅低，酸度就差不多，整體同泰國食到嘅十分相似，仲冇咁辣添，我覺得好正~ 明爐大蜆煲嘅蜆肉食落好新鮮，調味主要係酸酸鹹鹹加上微辣，非常惹味，送飯一流~ 蟹肉炒飯份量十足，飯粒炒得粒粒分明夠乾身~ 總括嚟講呢間泰菜食物選擇多同埋味道不俗，亦都比青衣城嘅餐廳抵食，住附近嘅街坊不妨一試