驚安燒肉商店

營業中

休息中

📍想試好耐嘅和牛燒肉店！主打日式平靚正和牛燒肉，臨走嗰陣見到好多人入嚟，原來午市同宵夜時段全單59折優惠。上•九宮格($388)拼盤嚟度時候會配埋張和牛部位表，俾我哋睇到邊一格係擺邊一款和牛。入面有和牛三角腩、和牛五花、和牛赤身、極黑和牛、和牛三筋、一口和牛、厚切牛舌芯、韓式護心肉、壺漬牛肋肉。朋友就比較鍾意油脂豐富啲嘅三角腩同牛五花，食落入口即溶。我最鍾意就厚切牛舌芯，燒到外表焦香，但係入邊仲係軟嫩口感爽脆，忍唔住再單點多一碟($88)，足足有四嚿厚切！每枱都有order和牛壽喜燒($98)，店員會即場拎火槍喺面前炙燒，再點落黑松露蛋黃壽喜汁配白飯食。碗醬勁香同比足一大碗，多咗嘅醬我哋仲點埋其他燒肉食。火炙和牛拌冷麵($68)就比紫菜飯更加適合配燒肉食，個味道酸酸甜甜再配埋幾塊醃蘿蔔，食完和牛後再食冷麵就會清爽好多。