無論食物質素服務態度都係不合格 完全唔符合佢喱個價錢 除咗個環境係坐得舒服啲 燈光昏黃格調顯示其高級感外 枱與枱係好貼 毫無私隱可言 都係敗筆
先講食物質素
揀咗
炭燒沙嗲牛肉串 $108
喱個個汁係問題 佢個沙嗲汁完全唔知咩味道 只可以話難食 食唔出有咩沙嗲味 只係一pat油醬咁 無香無味 個牛肉串叫正常發揮 本身都入味 肉質亦夠稔身 但喱個精華呢？個醬完全係毀壞之作
炭燒手切牛頸脊 $288
喱個個賣相唔錯 燒到外面熟中間生牛感 肉質尚算嫩滑 牛味好出 亦叫保留到肉汁 加埋個酸辣汁作調 喱個係合格之作 但唔會值到喱個價 牛嘅切法可以再薄身啲 而且中間條筋亦係扣分位
地道飛天通菜 $128
喱個不知所謂 最簡單嘅炒通菜 炒成一碟清炒通菜出嚟 名就改得威 食落完全似屋企無落鹽將啲通菜炒熟嘅求其之作 加咗啲啲辣椒都出唔到任何味道
海鮮炒金邊粉 $188
喱個好普通 海鮮唔見好新鮮 魷魚勁韌 蝦亦唔彈 整體味道你食唔出同food court泰菜鋪嘅有咩分別 叫做賣相好過佢 青檸都姑寒 俾兩小舊 勁乾 擠唔出少少汁
雪糕紅豆珍多冰 $78
喱杯嘢賣喱個價 好心個賣相都好小小 擺上枱都唔覺值喱啲價 不過算係成餐最出色 夠濃味
雪糕芒果糯米飯 $138
喱個賣相真係嚇死人 淡黃色嘅芒果 我懷疑佢將啲芒果放落椰汁到醃 成碟上枱真係好肉酸 正常繽紛嘅顏色變到不倫不類 重點係芒果無芒果味 唔知食緊乜 糯米叫軟糯 雪糕嘅芒果味亦好假 見到隔離枱同樣食兩啖就放棄 俾咗答案你
整體而言 喱間嘢真係好唔掂 嘢食基本上係差劣 唔好講個價錢 即使唔係喱啲價位都唔會收貨 仲要上菜速度勁慢 碟炒通菜夠膽係我哋食哂啲嘢先上 見佢速度慢 早啲落甜品 喱頭嗌 嗰頭兩分鐘送到 我哋啲䶢食都未食哂 真係無語。。。
啲員工扮忙 勁多個喺度唔知整咩 嗌佢哋都要啲時間先識回應 一間咁嘅價格提供咁嘅服務絕對唔容許 起碼時不時望向客人都做唔到 仲要上菜亦無禮貌 未食哂想收 同佢講仲食緊喎 仲要臨走一句thank you都無 咁樣埋單過千 真係好嬲 食自助餐唔好。。。
