泰然 (長發廣場)

營業中

休息中

專程為左食個咖哩麵包軟殼蟹而來，雖然餐廳位於屋村商場，但環境裝修舒適，平日晚上來，也不用排隊。食物方面，叫左個二人餐，加配一份冬陰公湯。原本落單叫咖哩麵包軟殼蟹、蟹肉炒飯同埋小食拼盤。侍應好好提醒麵包再加炒飯可能食唔唒。所以轉左個豬頸肉，而佢最尾都係好啱嘅，因為個麵包真係好飽肚。個咖哩麵包軟殼蟹嘅麵包底係烘過外皮係脆嘅，而咖哩加左蛋，令佢好易痴上麵包到。咖哩本身唔辣，香濃泰式咖哩味道，軟殼蟹雖然唔係好脆，但加埋個汁同麵包一齊食係好好嘅配搭。而食哩個蟹真係比想像中飽。至於豬頸肉同小食拼盤不過不失，係大家去泰國餐廳預期嘅味道。冬蔭公湯好足料，有有膏嘅大頭蝦，好濃味。初初飲落唔辣，但係有後勁，怕辣嘅人應該會覺得都幾辣。不過個湯係好香濃嘅，口味較重。飲品方面(冇圖)，叫左一杯芝士奶蓋紅肉火龍果沙冰，杯沙冰好香火龍果味，唔係用糖漿打出嚟嘅。不過配上成個二人餐嘅菜式都係飽肚野，個芝士奶蓋就飽上加飽。雖然杯沙冰好味，不過建議食咖哩麵包軟殼蟹同冬蔭公湯就叫相對清淡開胃嘅飲品會較好。埋單400有找，比起其他泰國菜算偏平，但個肚就好滿。屋邨價錢，優良質素，侍應有禮貌，值得再食。