瀛燒居酒屋

營業中

休息中

荃灣人氣居酒屋，裝修有Feel，星期六日行過同另一半試咗唔錯。環境店內貼滿有關日本嘅poster，又播住歌，幾有氣氛，餐廳仲有二樓。餐牌 雜錦海鮮米紙 $78 呢款算係crossover菜式？越式嘅米紙卷，入面係日式魚生，大量青瓜絲好Fresh，用嚟做頭盤啱哂。 日本直送原條季節魚-刺身 $298 是日季節魚係「魴鮄」，聽到個名內心笑咗笑😂 店員介紹白身魚本身魚味比較淡，附上酸汁，薑蓉唔洗點太多，彈性高，肉質紮實，味道清甜。 串炸 分別點咗日本白板魚蛋 $18、鵪鶉蛋$22、三文親子串$38，炸粉薄，每款都唔差，沾少少醬汁調下味勁惹味。 鱈魚白子半份 $88 自從食Omakase 食過白子之後，就夠膽食🤣 $88食到半份性價比高，入口滑溜鮮甜，酸汁又唔會蓋過鮮味。 手作煙燻豬肝 $48 另一半鍾意食肝，我就唔食嘅😂 呢款係凍食嘅冷盤，佢話質感做到好似Cheese咁又唔腥，鍾意食肝嘅朋友會愛上。 特色燒飯團 $58 以飯團作主食，入面如果加啲肉餡就更正啦！ 白桃HIGHBALL $58 及黑白啤 $68 話明居酒屋點可以唔飲酒，價錢都唔算貴。