馬祖 (海之戀商場)

營業中

休息中

今日因有要事到荃灣西站附近辦理，所以攞半日假去處理。辦完正經事，就睇下有咩食去醫下肚先。眼見荃灣西站呢度都有好多食肆，而本人就偏好食麵，所以最後都黎左呢間~馬祖台灣養生湯麵館。呢度的主食配以麵類的米線及手工麵為主，亦可配飯。而湯底都以藥膳養生湯底為主打，亦有為好辣人士的香辣養生湯底。藥膳古早牛肉湯手工麵~本來我好奇點解呢碗野賣$70之際，上到枱見真章，牛肉真係好足料夠份量，牛肉夠淋，亦好入味，兩塊蘿蔔又淋又甜；手工麵夠彈牙；湯底係好濃郁的古早牛肉湯，再加上紅棗，龍眼等藥膳材料，$70係值嘅。藥膳桃膠農場雞米線~首先試左個湯底先，藥膳湯底好清，好飲；雞件的件頭比平時的大件，今日好好彩，比左雞翼位同少少上脾位，都滑嘅，有雞味；桃膠浸得夠，養生之寶最喜愛，而米線亦都煮得好彈牙，我喜愛的口感，還有雲耳作配，紅棗，杞子等藥膳材料，我好喜歡這個配搭，最後我差不多飲哂成個湯底。藥膳上湯墨魚春卷~呢個小食的藥膳湯底最濃，紅棗的份量超多，而墨魚卷，似炸魚旦的做法，同藥膳湯底好似唔係太夾。整體而言，養生係現代香港人追求，有呢個諗頭係唔錯，而麵食比飯類容易上口，呢間店係我杯茶。