新貴香園 (荃昌中心)

營業中

休息中

平時提起荃灣嘅雲南米線，好多時都係老闆娘或者唯一嘅雲貴川，不過原來另一邊都有一間好食嘅雲南米線店叫做新貴香園。雖然店名有個「新」字，但聽荃灣街坊講其實已經開咗一段時間，店舖門面亦唔似係近排開嘅樣子。講起米線，今次試嘅係麻辣中辣，湯底辣度唔算好刺激，反而有比較清嘅豬骨、雞湯嘅味道，好似係麻辣米線中嘅清泉，同屯門嘅雲川有異曲同工之妙。餸菜方面亦都出色，豬扒大塊炸得香脆入味。但最特別嘅反而係雞翼，平時只會炸到個皮脆已經整得唔錯，但新貴香園嘅雞翼首先醃製過再生炸，用咖喱粉餣過，味道有驚喜！另外腐皮角亦都特別，唔係間間都有提供。最後食麻辣米線當然要配凍飲啦，份量都幾大杯。整體味道唔錯，餸菜又有特別之處，價錢合理，不過因為老闆娘而家只係做晚市，而且要排隊至少一個鐘頭，如果唔想排隊，我建議可以試下新貴香園。