傑星冰廳

營業中

休息中

最近深水埗汝州街新開咗間茶餐廳「傑星冰廳」，位置算方便，價錢親民，選擇夠多，感覺主打街坊熟客生意。平日晚市時段都坐得七七八八，睇落都幾受歡迎，今次同老公嚟試試，點咗幾款招牌小菜。首先係蔥爆牛排配飯上枱時已經聞到陣陣蔥香，牛排切成適中大小，表面炒得香口，咬落去肉質有嚼勁但唔韌，醬汁鹹香中帶微甜，撈飯非常適合，簡單又滿足。蝦仁炒蛋飯蝦仁爽口彈牙，飯粒炒得分明，完全唔覺油膩，配搭青瓜、青菜、火腿一齊，夠家常又幾好食椒鹽豬仔骨外層炸得乾爽酥脆，啖啖肉之餘，椒鹽調味唔會過鹹，咬落香口惹味，骨頭比例適中，食落唔會覺得太多骨最後酥炸墨魚丸亦有驚喜，外皮炸到金黃脆卜卜，咬開時內裡煙韌彈牙，墨魚香味濃郁，唔會有雪藏味，配搭椒鹽食特別惹味。整體嚟講，傑星冰廳價錢合理，味道有誠意，唔花巧但勝在穩陣，環境乾淨企理，服務態度親切，十分適合街坊日常食飯，想輕鬆食飽一餐，呢度會係個唔錯嘅選擇。