老闆火鍋冰室

營業中

休息中

今日去元朗食港式火鍋，雖然有雞煲可以揀，不過都係揀返普通火鍋湯底試一試佢，今次就叫咗個沙嗲鍋，花生味濃，唔似其他店嘅湯底得隻色咁，微辣、。話說佢個餐桌嘅設計都唔錯，個煲位陷落去，唔使吊高隻手就夾到嘢食，係一個暖心位。安格斯牛頸脊牛味十足，一咬落去濃濃嘅牛奶香，絕對可以歸功於分佈均勻嘅牛脂。牛舌十分爽口，大大塊，淥完都唔會話縮哂水咁，肉味都十分足夠。其他嘅食材選擇亦都唔少，一份菜都好足料，包仔豆腐同蜂巢豆腐吸引哂沙嗲湯嘅精華。值得一提嘅係一入座就上咗每人一塊嘅吉列蠔、一塊炸蝦餅、一隻炸蝦。吉列蠔新鮮多汁，濃濃嘅海水香喺咬落去嘅瞬間爆發開嚟，非常之唔錯；蝦餅就夠哂彈牙、大蝦就炸得夠脆，連殼都可以食埋。