Burgerman (埃華街)

營業中

休息中

今日去開大同新邨見客，做完嘢順便去買六合彩，經過呢間漢堡店有啲印象，諗起妹子提過响深水埗食過，都幾好食，叫我有機會試吓，反正未食晏，食完先去投注站。裝飾帶點懷舊美式風情，仲有一個路線66嘅標誌，一條往返大角咀嘅巴士線。店內大約有10個坐位，原本有5-6個客坐响度，當我買完食物時，午餐嘅客人陸續離開，突然之間變咗包場。叫咗個菠蘿雞腿漢堡，加$28要多個水牛城雞翼，仲有一罐可口可樂。菠蘿雞腿漢堡，外型顏色靚靚麵包烘得微脆，中間夾住菠蘿圈、車打芝士、炸雞腿、蕃茄、羅馬生菜， 菠蘿香甜，雞腿香脆肉嫩，蕃茄新鮮、生菜爽脆，配埋特別醬汁好好食，正！水牛城雞翼上放咗一撮翡翠豆苗，即刻提升咗可觀性。雞翼炸過再淋上微辣嘅醬汁，肉質嫩滑，都幾惹味。估唔到漢堡包可以咁好食，呢度有和牛漢堡，仲有當店限定嘅飛驒和牛漢堡，下次一定要試吓。