馬拉公公

營業中

休息中

前幾日阿囝放學後，同佢行去Gogomall food court搵食。果度啲位唔係好多， 但平日lunch time 都唔算太多人， 好快都搵到張檯。咁啱張檯係馬拉公公附近， 我就睇下佢有冇野啱阿囝食。阿囝睇完個餐牌， 話想食吉列豬扒， 但見佢啲吉豬都係咖喱， 唔知小朋友食唔食到， 我就問老闆娘意見。老闆娘話如果小朋友食， 建議食白咖喱， 冇咁辣，甜甜地，易入口。所以我哋就聽老闆娘建議叫左白咖喱吉豬飯，凍美綠，然後再叫多個白咖喱無骨海南雞摻摻，凍檸水俾自己。等左十幾分鐘便有得拎，個賣相都好得，老闆娘仲好貼心的話只淋左少少咖喱汁係上面， 唔夠再自己加。阿囝食左一啖就話好味，話唔辣，吉豬一舊駁一舊咁食，好快食晒啲豬扒。啲飯好多， 食唔晒， 下次要叫少飯先得。我果個無骨海南雞摻摻，真係做到無骨(除左舊雞翼)，D雞好嫩滑，白咖喱湯底好入味，唔辣。摻摻索晒個湯底啲汁， 好正!我好快就K.O. 左佢！之後我search openrice, 原來馬拉公公係屯門好出名，有好多好評，下次再來試其他野。