國金軒

營業中

休息中

第二次喺呢間國金軒食晚飯，上次係兩年前同媽媽慶生，當時覺得食物質素好，所以今次再嚟。可能因為最近環境問題，令食肆晚飯生意少咗，見我哋有11位就安排入房坐，以我所知平時訂廳房有最低消費，所以今次星期六嚟無最低消費有房坐都幾好彩。本來想食和牛，但侍應就推介無花果羅勒牛肉，做法其他地方較少食到，幾特別。魚就食咗原條東星斑兩食—XO醬蘆筍炒斑球同陳村粉蒸頭腩，味道唔錯。爵士湯做得唔及西苑好，無咩特別。屋企人覺得個松露野菌炆伊麵最好味，我就覺得啫啫唐生菜夠香夠惹味。因為知道我哋係為長老慶生，侍應好貼心送咗甜品，係萬壽果燉雪耳，清甜滋潤。整體食物質素相當唔錯，而侍應服務亦算殷勤，只係上菜時間太長，由落單到埋單差不多兩個半鐘，可能高級食府係咁，只係我呢啲平民百姓唔習慣。