大壹燒鵝 (登輝大廈)

營業中

休息中

去咗銅鑼灣時代廣場買嘢，已經天都黑晒加上肚仔有啲餓，行過去登龍街食晚餐。一見到大壹燒鵝就進入，幸運哋有卡位坐，點咗個一人一個套餐，有例湯有雙拼飯有杯嘢飲還有碟菜，加多個燒鵝上庄例牌。好快就嚟到例湯，係木瓜雪耳南北杏排骨湯，夠晒火候老火湯，清甜滋潤我連湯料都食埋！熏蹄拼燒腩仔，熏蹄點咗白醋皮爽脆酸酸地好醒胃。燒腩仔肥一層瘦一層，食落口皮燒到卜卜脆肉又香。另一碟雙拼叉燒&貴妃雞，半肥瘦叉燒還有燒燶邊，夠晒味又夠腍好好食，貴妃雞皮香肉嫩又夠滑，好有鮮味，燒鵝賣相好吸引。一食 果然出色，皮脆油香肉嫩，再加上點埋酸梅醬，酸甜開胃真係絕配。飲埋杯香濃熱咖啡，完結咗美味的晚餐，大壹燒鵝啲服務員態度非常好，環境衛生乾淨，又坐得舒服，值得推介俾大家。