自家製韓國刀削麵 (山林道)

今晚同朋友喺尖沙咀行完街，去咗山林道呢間[自家製韓國刀削麵]試佢哋嘅刀削麵。餐廳唔算好大，但坐得幾舒服，啱晒同朋友傾住計慢慢食。

我點咗花蛤刀削麵，湯底清甜，飲到淡淡嘅海鮮味。花蛤食落幾鮮甜。朋友叫咗牛骨湯刀削麵，湯頭濃郁得嚟唔會太鹹，飲完成個身暖笠笠。雖然麵條唔係即場削，但口感依然煙韌，咬落去有嚼勁，掛湯效果唔錯。

另外叫咗份蒸雙拼餃子，有豬肉同泡菜兩款。豬肉餃餡料飽滿，咬開有肉汁；泡菜餃就微微辣，幾開胃。餃子皮厚薄適中，蒸得剛剛好，唔會太乾或者太濕。

食物質素唔錯，價錢都便宜。如果想喺尖沙咀食碗熱辣辣嘅韓式刀削麵，呢間係個唔錯嘅選擇。