首先要讚佢哋個湯底，我哋揀咗鴛鴦鍋，沙嗲湯濃郁惹味，芫荽皮蛋湯清甜滋潤，兩個湯底都足料，未落料已經飲咗兩碗！
牛肉方面絕對係驚喜！叫咗個本地手切牛頸脊，油脂分布靚到不得了，輕輕淥8秒就食得，入口軟嫩仲帶淡淡牛香，個質素拍得住高級牛肉專門店！另外仲試咗安格斯肥牛，油花均勻，牛味濃郁，食肉獸必點！
海鮮亦都唔輸蝕～鮑魚上枱仲識郁，新鮮到不得了！淥熟後口感爽彈，鮮味十足。仲有白鱔片切到薄薄哋，淥完脆脆哋完全冇腥味，正！
丸類拼盤都係心機之作，特別係佢哋手打嘅墨魚丸，真係食到粒粒墨魚肉，彈牙到可以打乒乓球！芝士牛丸爆漿效果一流，但要小心燙口啊～
最後不得不提佢哋自家製竹蔗茅根，清甜解渴，同火鍋係絕配！
2
2
1
3
5
