新忠記打冷小菜館 (已搬遷) 新店位置

有時下午經過紅磡寶其利街，通常焦點會放係香噴噴串燒店美味佳，呢次夜晚係附近，想試下其他。「新忠記打冷小菜」經過無數次，次次都見座無虛席，尤其冬天，可能好多人食羊腩煲掛。今次見裡面有張吉枱，就二話不說入去了。食潮州菜都唔駛講咁多，鹵水係必點的，但又貪心，點左雙拼：鵝片拼大腸。鵝片切得薄薄的，雖然偏瘦但都好腍好滑。鹵水顏色比較深，但又唔會好鹹，相反好有醇香。大腸幾肥，但軟腍，咬落去亦有肥膏油香，怕太肥膩，點d醋食可以中和下。墊底的豆腐先係精華，有肉的香，又有鹵水的鹹。蠔仔肉碎粥（$45碗）當然唔少得，雖然話一碗，但兩個人的話每人都分到2-3碗。本身就唔濃味嘅，作為食鹵水時清清味蕾都唔錯。蠔仔粒粒都勁大勁肥美，唔算腥，而且越食越有，落足料。係d咁街坊式店食嘢，叫碟豉椒炒蜆（$75）最啱氣氛。鑊氣的確好足，豉椒汁唔多唔少剛剛好掛係每隻蜆度。雖然蜆肉炒到跌晒出來，但至少唔會唔見晒，肉都尙厚，沙亦少，質素頗高。要留意，呢度的餸菜唔係平，但就碟碟都勁有分量（侍應叔叔話係賣點），所以人少的話唔好眼闊肚窄，要量力而為。