滿堂樂滬京風味

營業中

休息中

最近有間紅磡街頭嘅米芝蓮小店搬咗新舖，以上海小食打響名堂，主打即叫即包嘅粢飯同鹹豆漿。新店地方闊落咗，可以容納到20個客左右，但平日晚上到訪都需要等位 ，深受街坊歡迎。粢飯有鹹有甜，新鮮熱辣辣整起，前者含有肉鬆、榨菜同油條，後者就得油條同糖。糯米飯軟糯可口，外層微微脆身，攞起粢飯唔會鬆散，而且入面餡料滿滿，估唔到食咗半個已經有啲飽。豆漿有鹹有甜有熱有凍，私心推介鹹版本，加入大量蔥、油條同蝦乾，帶口感，油條吸滿湯汁，豆味香濃，越飲越上癮。剩熱豆漿嘅可以要無糖，見唔少人飲緊，飲落暖笠笠，十分健康。主食有雲吞豬扒同冬菇麵。麵條可因應個人喜好選擇軟熟度，雲吞外層薄身，餡料多，味道偏淡，建議可以加黑/紅醋或胡椒粉、豬扒夠大塊，外皮炸之前酥脆可口，肉質軟嫩，啖啖肉、冬菇大粒又Juicy、雞扒入味唔油膩，性價比高。