月橋正宗越南湯粉

營業中

休息中

太子一間毫不起眼的鋪頭，就係食正宗越南河粉嘅好地方，今日專程帶阿妹嚟幫襯。月橋嘅內隴唔算大，只有幾張四人枱，但食客不斷。阿妹食招牌火車頭配金邊粉 ，原來有四款食材，包括牛丸、牛肉、牛展及牛腩。招牌湯底，香氣十足，牛丸彈牙，牛肉嫩滑，牛展甘香，而牛腩軟淋，阿妹覺得非常好食兼抵食 ，仲話有處身泰國嘅感覺。佢再配一杯特飲咸檸七，只係加九蚊，阿妹話咸檸七鹹鹹地又有氣，可以開聲及化痰喎。我就叫咗一碗牛腩牛展金邊粉 ，牛展切得薄身，一片片夠爽口彈牙，冇靭嘅感覺；相對牛腩就大大件，較厚身，有嚼勁，而湯有清香牛肉味，一邊食住金邊粉，一邊飲啖清湯，好夾。對於大胃王嘅男士就非常適合，因為無論材料或者金邊份都好大份，非常飽肚。兩人再叫咗個越式炸蝦餅， 係即叫即炸嘅，顏色好靚，係金黃色，好吸引食慾，香氣四溢，急不及待放入口，熱熱地零舍好味有鮮蝦嘅甜味，爽彈之餘又脆香，我大力推薦呢個小食，阿妹都豎起手指大讚。我跟餐就點咗椰汁紅豆冰，好香椰汁味，加埋淋身紅豆粒粒，香甜好飲。阿妹話下次阿哥再請食飯嘅時候，都會再考慮返噚味。