蘇山雞飯

營業中

休息中

餐廳位於太子地鐵站附近，主打多款特色星馬菜，每次經過都大排長龍，店內環境唔大但座位之間有適當距離，有卡位、普通座位同一張大枱，食物價錢合理，菜式老少咸宜，適合聚餐。主食方面要咗個娘惹咖哩牛筋腩干撈老鼠粉，咖喱香濃，唔辣，牛腩份量唔少，大塊且啖啖肉，老鼠粉軟硬程度適中，若可以要多醬就完美了。另外建議可以加點烤餅嚟點，酥脆又唔油😉健康之選有怡保魚丸手撕雞湯粿條，魚丸彈牙，手撕雞唔嚡，麵條可以再煮腍啲，不過整體搭配都唔錯。小食方面有醬油雞腳，六大件，帶點咬口，煙煙韌韌，而且醬汁幾入味，性價比高。私心推介鮮油咖央多士，未食已經覺得好邪惡，麵包脆身，牛油超厚，不得之了。雞雜冬瓜湯都唔錯，暖笠笠，淡淡香氣，一碗唔夠飲。依家仲有個夏日Summer餐牌，大推砂拉越菠蘿冰同開心果椰子奶昔，前者採用新鮮果肉，完全無落糖，飲落超清新，記得要刮埋啲菠蘿肉食，真係食到舔舔脷、後者味道香濃，甜甜哋咁。