風車

營業中

休息中

聽名可能覺得風車係一間cafe，實際上佢係一間食西餐嘅酒吧。當時正值晚巿，但時間較早，進入餐廳嘅時候侍應都問我哋要唔要揀啲冷氣無咁大嘅座位，服務方面有質素。我哋叫左頭盤前菜各一，再加上兩個主食。食物等左幾分鐘開始送上。先上枱係頭盤嘅三色多士。多士底部嘅麵包脆身但唔硬，一次過試哂火腿、煙三文魚同咸牛肉，送酒或做前菜一流。跟住上枱嘅係前菜炒大蝦。廚師炒香煙薰香腸，以腸嘅鹹味做基底炒大蝦同配菜，加上少許沙律菜以清新做平衡，味道恰到好處。主菜之一嘅黑松露意粉，意粉上有配以芝士焗嘅大啡菇。大啡菇焗得啱啱好，香味濃郁之餘切開更有大量汁液。而意粉用上唔少嘅松露醬，拌以炒香嘅蒜片，味道香濃。而意粉本身亦煮得啱啱好，唔會過軟或過硬。最後送上係紐西蘭肉眼扒伴焦糖菠蘿。牛扒比想像中大塊，並按要求嘅五成熟烹調好。扒身無筋，而且食得出好濃嘅牛肉味。菠蘿比較少作為牛扒嘅配菜，不過當日所食嘅菠蘿香甜多汁，清新嘅味道出奇地平衡返濃味嘅牛肉眼扒。風車嘅主菜份量比其他西餐廳平均為多，落單時可能要稍為留意。