海陸空

營業中

休息中

尖沙咀有咁多間韓國餐廳，我最鍾意呢間。味道正宗、菜式選擇多、性價比極高，而且韓國人主理，有濃厚嘅韓國氣氛。餐廳環境相當寬敞，如果係一大班朋友過黎食都容納得到。首先，大力推薦石板韓式海鮮炸醬麵，炸醬麵在熱石板上滋滋地冒着熱氣，見到都已經流晒口水。我最鍾意韓國麵既煙韌彈性，每條麵條吸晒醬汁，再配上魷魚、大蝦等海鮮配菜，口感甜甜味，真係啖啖滋味啖啖滿足。其次要大推韓式糖醋骨，呢碟糖醋骨炸粉厚度剛剛好，豬肉炸到酥脆香口，再淋上甜酸醬汁，咬落去肉質嫩滑，一啲都唔覺得油膩，而且份量好多👍🏻食韓國菜唔少得炸雞配啤酒啦，今次點咗半份韓式甜辣炸雞，同埋朝日啤酒🍻 半份都已經夠三個人食，上枱嘅時候炸雞仲係好熱，咬落去好酥脆又唔厚粉，甜辣醬好開胃，加上啤酒落肚，好暢快勁爽！最後幾乎每一張枱都叫咗烤肉而我哋叫咗牛肋肉和濟州島黑毛五花肉拼盤。濟州島黑毛豬好出名，完全無豬肉酥味，店員會幫手煎及切細件，仲會教你點邊一款醬汁最好食，完全冇令我失望，食唔停口。牛肋肉煎到七成熟，裏面仲有少少粉紅色，咬落去仲好香牛肉味，牛肉點左醬汁，更加提升咗鮮味👍🏻