新泰東南亞餐廳 (已結業)

最近心血來潮好想食泰國野，上網搵搵銅鑼灣附近有咩泰國餐廳就見到新泰，見評語都唔錯就同男朋友兩個去食。大概七點幾去到餐廳，一入去已經比佢環境吸引左，裝飾得好有feel好幽靜既感覺，坐落都好闊落好舒服。因為放工實在太肚餓兩個人都叫左好多野食，首先黎左野飲，我地叫左椰青沙冰同龍眼冰，個椰青沙冰好驚喜，好有椰香味而且份量好大，飲左一淡就停唔到，超級推薦！龍眼冰就都正常。之後上左椒鹽軟殼蟹，炒得好香，做前菜啱啱好。之後就到泰國餐廳必點既豬頸肉，都幾香口同埋一碟都有好多片，另外配左個泰式既醬汁，我自己就鍾意就咁食唔點醬多d🤤主菜叫左菠蘿炒飯同南瓜海鮮飯，半個菠蘿上面放住熱辣辣炒飯，入面有d雞肉肉鬆腰果等等，仲食到唔少舊菠蘿，去泰國餐廳叫菠蘿炒飯永遠都唔會中伏，好開胃好好食。另外南瓜海鮮飯就好多南瓜蓉，鍾意食南瓜既朋友可以叫黎試下，入面仲有好多款唔同既海鮮🙈最後仲有個鴨肉生菜包，肉碎鹹鹹地啱配生菜食🙆‍♀️兩個人食左好多野，坐左好耐環境舒服，野食質素都唔錯好地道泰國菜，而且另帶一提服務員全部都好好態度。如果大家心癮起想食泰國菜新泰係唔錯既選擇。