重慶粉麵小食

營業中

休息中

和老公去附近買野，順便醫肚去到巴士站附近有一間小店食重慶粉麵。老闆娘一個人做晒成間鋪，都幾忙，同埋都陸續有人買外賣。雖然地痞小店環境欠奉，起碼有幾把大風扇夠涼，因為我哋烈日行咗成二十分鐘所以入到黎簡直如飲甘露。叫咗一個重慶酸辣粉、紅燒豬腸米線同埋皮蛋配豆腐。最初仲諗價錢都唔平，但原來每樣嘢都大大份，咁都值回票價。不過如果可以揀大細份量會更好。每樣我哋都揀BB辣，上菜時見到好好仲有啲驚，不過食落真係只係微辣。重慶酸辣粉有大量榨菜、酸菜等等配料，風味十足，所以覺得味道唔錯，唔係粗製濫造。唯一有點美中不足係薯粉真係煮得太過淋，冇咗煙韌嘅感覺。老公食紅燒豬腸米線，湯底帶點紅燒的惹味，不過不失，不過我自己覺得豬腸仲帶有丁點兒騷味，如果好注重乾淨嘅就未必適合。不過三十幾蚊碗米線呢個又覺得幾抵。皮蛋配豆腐用上原來係大盒裝嘅百福豆腐，份量比我想像中多，而且隻皮蛋係流心加透明，質素唔錯。雖然啲豉油辣油睇落好似已經淹沒左啲皮蛋豆腐，但食落又唔會好過於濃味，這樣簡單小食反而有點驚喜。雖然食物質素未係好高，但地痞小店大大份要醫肚都唔錯。