敏華冰廳 (黃埔天地奇妙坊)

平時都鍾意去敏華冰室食早餐，筲箕灣，銅鑼灣…都去過，招呼唔錯，食物可以。

唯獨是黃埔呢間敏華冰室！服務真係令人好失望！

食物到咗，我杯凍奶茶少甜未到，明白假日會比較繁忙，但係食緊嘢途中口乾都會想飲返啖嘢

只係問一個女服務員：「我差杯凍奶茶未到，可唔可以幫我睇睇？」
女服務員：「你點咗就會有單㗎啦」

我😑心諗～個個都有落單㗎啦，就係等得耐先追，你講幫我追一追都好呀～小小㷫追問：「就係等得耐可唔可以幫我睇睇？」（禮貌嘅）

冇幾耐，佢攞住一大盆嘢飲周圍派，我估應該係唔夠人手出餐出嘢飲。其實服務業唔夠人，好多香港人都會明白。但係你唔好咁樣答個客啦～算！唔好計較

點知…首先我係點少甜凍奶茶，嚟到係一杯超甜凍奶茶！簡直好似飲緊糖水⋯
我都唔想麻煩，但係真係飲唔到！然後問男服務員：「其實我係要少甜，但係你嚟咗杯超甜嘅俾我，我真係飲唔到」
男服務員態度係唔耐煩：「一係我加冰俾你囉，或者俾多啲茶膽你囉⋯⋯我哋少甜凍奶茶係整定嘅！」

我好鬼㷫！check都唔check咁答，咁都有機會攞錯㗎嘛！如果係咁你餐牌就唔好有［少甜］凍奶茶啦！

老實講，其他分店或其他茶記好快都會換咗俾我，我只係想要我自己嘅嘢啫，係咪咁簡單嘅都做唔到？

最後佢換咗杯走甜凍奶茶比我，我心諗好過個杯超甜凍奶茶，好似飲糖水咁飲根本飲唔落！只係食個早餐都可以咁，可一不可再！

Ps. 其他分店服務好好，黃埔敏華連普通茶記服務都不如。