NINETYs Roastery

營業中

休息中

銅鑼灣鬧市中嘅靚裝cafe－將植物融入設計、玻璃窗採光度十足，感覺悠閑，係個品味咖啡嘅好地方😌下午嚟到除咗咖啡外仲有casual / fine lunch，試下依碗「銷魂飯」－叉燒用美國梅頭肉，經慢煮12個鐘再搽蜜糖煎，厚切肥瘦分明，加兩隻太陽蛋，仲有伴碟但烤得好好味嘅車厘茄，醬汁多啲撈飯就更正～凍稻亭烏冬更有特色－刺身級嘅帶子、油甘魚切粒加三文魚籽，用熱情果香醋伴勻，食落好清新啱晒夏天！夾埋墨魚汁脆脆食口感又唔同，亦可以淋上旁邊熬到奶白色嘅凍魚湯，味道更濃郁。Cafe亦有引入其他小店嘅bakery同曲奇，今次食咗Sugarism嘅Dark Chocolate Cookie，係超－大－塊！曲奇可以加熱食，半溶嘅黑朱古力同合桃依個組合好夾，好邪惡啊🤤NINETYs有自家嘅Roastery，佢地嘅Fruity Blend喺Coffee Review上拎到95分高分，對咖啡非常講究，仲會配上小卡片介紹每種blend嘅成份。Choco Blend會配上藍莓乾，nutty啲口感醇厚。微酸嘅Fruity Blend就配上杏仁，店員介紹先食杏仁再飲啖咖啡，可以更易品嘗到咖啡嘅味道同層次。