因為最近見到馬辣台式鴛鴦火鍋推出左一系列超吸引既限時優惠，就約左朋友去晚市食個痛快晚餐🍲。佢依家性價比好高：憑全港任何消費單據票尾，晚市惠顧每枱即減$20；生日有優惠；六人晚市入座仲有一人免費—好適合公司餐聚同family聚會，平靚正又有得食得夠開心🎉。
2
.
我地揀左B餐 $228/位，晚市任飲任食2.5小時，款式超多，有近百款火鍋配料可以任揀。基本A餐$208/位已好抵，但B餐只係加多$20就升級到更多靚肉：一口牛頂級牛梅花、特選安格斯黑牛、精選牛五花、黑豚五花肉全部任食；B餐額外仲有極上無骨牛小排、手切肥牛同白鱔片，份量同質素都好誠意，食落好滿足。
.
鍋底我非常推介佢既招牌台式麻辣鍋拼花雕醉雞鍋（加$30升級）🔥。湯底共有10款選擇，加$30可以食到花雕醉雞鍋：一大碟花雕醉雞，面頭灑住一層杞子，雞肉有陣陣花雕酒香，放落鍋滾一下，湯底同雞件互相帶出層次，帶出藥材香。台式麻辣鍋方面落左京蔥、干辣椒、花椒同鴨血等，麻辣有層次，香度夠且帶微微甘香，配料一齊落鍋好夾。
.
肉類表現好突出，特別推介極尚無骨牛小排—油花均勻，入口有牛香同嫩滑既口感，果種入口即化既感覺真係叫人想再encore。手切肥牛切得厚薄岩岩好，肥瘦比例好，涮一涮即熟，肉味濃又帶彈性；我仲再叫多幾次添😂其他例如頂級小肥羊肉同黑毛豬梅花都幾有水準，選擇多又吾悶。
.
海鮮選擇都吾少：有海生蝦、脆肉鯇魚骨腩、脆肉鯇魚片、雞子、白鱔片、紐西蘭青口等。特別推介白鱔片，係B餐獨有，切得薄而新鮮，落鍋輕輕一涮就滑溜溜，魚油香明顯，好適合襯麻辣湯底。
.
自助區既火鍋配料超豐富：雞髀菇、南瓜片、雲耳、冬瓜片、萵筍片、炸芋頭、蟲草花、台灣花枝丸、台式香腸、魚片頭、台式滷大腸、牛筋丸、台式香菇貢丸、台灣麻吉燒、炸豬皮、粉絲、魷魚、台式蜂巢豆腐、芝士腸、台灣粗麵……特別推介韭菜豬肉餃同旺菜牛肉餃，全手工包製，餃餡好新鮮，粒粒餃子都包得好大粒、好足料，值得一再encore。
.
甜品同熟食部分其實係整個晚餐既驚喜位：甜品有白桃白涼粉、士多啤梨蛋糕、蜜瓜布丁同椰子奶凍，清新又解膩。熟食有滷肉蛋、咖喱角、炸春卷。最吸引既係即制花生煉奶格仔餅，同法式燉蛋同牛油麵包布丁——全部係即叫即整，熱騰騰上枱，特別係法式燉蛋，香滑幼嫩，燉蛋控一定會encore多幾次。呢d吾係間間火鍋放題店都有，感覺好有誠意同驚喜🎉。
