三日月

營業中

休息中

無左晚市，晚晚返屋企煮飯，食到悶哂，發現呢度鐵板燒午市都照常營業，仲好多款式揀，一定要食好野減減壓。揀左1380餐，師傅係你面前即整即食，確保新鮮衛生，店面坐位唔多，夠闊落唔逼，可以安心用餐。頭盤有好特別嘅雞肉刺身，帶淡淡煙燻咸香，幼嫩彈牙，值得一試。北海道生蠔，好新鮮，蠔味鮮甜，厚肉，爽口回甘。極上刺身，有牡丹蝦，大 toro, 赤貝，帶子，油甘魚，整體好新鮮，toro 好甘香。燒元貝係驚喜菜式，熟度約7成，鮮甜程度爆標，配麻油炒香嘅菠菜，吸收左元貝汁精華。鮑魚好大隻，鮮甜彈牙，鹽燒可以帶出鮑魚鮮味。長腳蟹腳好粗好厚肉。燒蔬菜拼盤的香菇，香味非常濃郁，南瓜溏心，好甜好淋。主菜牛柳，要左3成熟，覺得真係揀啱左，肉質好軟好嫩，牛柳油脂量少，即使減肥中嘅人都啱食，但依然好多肉汁，非常滿足。炒飯用左梅醬同櫻花蝦炒，微酸得黎帶出蝦香，帶微微飯焦效果，脆脆地口感好好，仲比左鰹魚湯，可以變做泡飯，令酸梅酸味更加突出，1個炒飯2個效果，勁！甜品係抹茶雪糕，口味香濃唔會好甜，唔錯。疫情下能夠搵到慢活豪嘆嘅地方，真係唔多，用餐嘅時候同師傅可以互相交流，係愉快嘅用餐體驗。