Burgerman (埃華街)

去到今時今日，終於食過哂大部分嘅出品，所以再分享。

肉醬意粉
唔係一般蕃茄肉醬，而係墨西哥式嘅肉醬。一般香港嘅食店都有提供呢一個味道，所以幾特別。由於我個人鍾意墨西哥肉醬呢個味道，所以都好鍾意。如果老闆可以考慮提供墨西哥肉醬淋上薯條上呢一個選擇，咁就完美。

蘑菇黑松露意粉
就咁睇樣唔係好特別，但食落去係超好味。蘑菇係新鮮炒嘅，加埋醬汁同埋黑松露碎味道係一流。如果嗰日唔想食肉，呢個係好選擇。

卡邦尼意粉
正常嘅卡邦尼意粉，如果可以加隻蛋就應該會更好。

烤菠蘿雞腿漢堡
我個人唔係十分鍾意雞肉嘅漢堡（因為麥記俾得太多唔好嘅記憶）但因為想試哂所以出品，所以就叫嚟試吓。一食嘅時候係完全驚喜。雞扒多汁、夾埋菠蘿以及特別醬汁係完美。以後想食雞漢堡就只會諗佢。

牛油果大啡菇漢堡
啲菇好香，好好食。配埋牛油果醬係一流。另一唔食肉嘅好選擇。

其他嘅牛肉漢堡，因為之前已經寫過，所以今次唔寫啦。或者補充一下，飛驒牛漢堡都係用新鮮蘑菇，加上煎蛋嘅香味，真係物有所值。

而薯條就要再寫一次，真係好好食。就算我食意粉都會叫薯條食。茄汁再加 Tabasco 用嚟點薯條完全係我杯茶。