餃掂手工餃子雲吞專門店

我向來係一個餃子控, 平時諗唔到食咩既時候, 一定會去食餃子。今日就去試呢間位於灣仔既餃子店。黃金原味皮蛋 $28 - 味道同普通皮蛋有少少唔同, 黃金皮蛋有一種獨特既香味, 配上麻辣既醬汁同食, 別有一番風味。四川涼麵 (小辣) $30- 麵質略帶點爽口同彈牙, 配上麻辣醬汁同食, 惹味十足, 食到停唔到口。芫茜豬肉煎餃 (10隻) $63 - 餃子粒粒飽滿, 即叫即煎, 底部仲煎到卜卜脆, 一咬開就聞到誘人既芫茜香氣, 豬肉爽口彈牙之餘, 仲肉汁豐富到差唔多滿瀉, 大推! 大白菜豬肉湯餃 跟狀元九鼎湯 (10隻) $54- 淨係食香口既煎餃又點會夠, 當然要食埋清淡既湯餃先夠滿足。湯底用上多款新鮮食材淆制而成, 包括粉葛, 鯪魚, 扁豆, 赤小豆等等, 全部都係去濕既材料, 特別適合夏天飲用, 而且無味精夠哂健康。餃子皮厚薄適中, 一咬開D肉汁勁juicy, 白菜同豬肉餡既比例剛剛好, 而且味道調得剛剛好, 唔錯。餃掂手工餃子雲吞專門店 灣仔莊士敦道44號地下港鐵灣仔站B2出口, 步行約4分鐘