心鉄板燒 (已結業)

尖沙咀亞士厘道而家開咗好多餐廳，有好多選擇，今日下午去了這間商業大廈裏面嘅鐵板燒。餐廳有個轉角位，所以好開陽，可以睇到好靚嘅海景，店中間有個大魚缸，見到海鮮特別新鮮。點了二人套餐$988，前菜有個蟹柳沙律菜及螺肉。南非鮑魚配蟹肉味噌，新鮮嘅南非鮑魚，入口彈牙，廚師手勢一流，看著鮑魚由生煎到熟，完全一個視覺上嘅享受，鮑魚切開一啲都唔韌，先食原味，又鮮又甜，之後配上旁邊蟹肉味噌，鲜味更特出。石班塊配意大利番茄乾及他他醬，斑塊煎到外皮焦香，中間肉質依然鮮嫩，配上他他醬，魚味更鮮甜，加上旁邊嘅意大利蕃茄乾，味道更有層次。清酒煮蜆，用上大量清酒，酒精燃燒後，味道依然強烈，食完蜆之後個湯先至係主角，入口十分醒神。神戶黑豚配泡菜及蘋果蓉，肥膩嘅豬肉捲住清爽嘅泡菜，入口味道清新，旁邊嘅蘋果蓉非常清甜，一鹹一甜嘅組合味道又好融和。牛肉薄燒漬物，中間不是青蔥而是昆布及牛旁，帶和風味道，入口味道由濃至淡，配少少生葵可以減少油膩感。日本高菜櫻花蝦炒飯，高菜通常配九洲拉面，今次用嚟炒飯，入口鹹香，鮮味十足。最後有炒雜菜及自家製奶凍多士，廚師炒喺鐵板上慢慢煎到焦磄化的多士，非常香脆又有心思。