羅東肉焿番

營業中

休息中

店舖位置方便，離元朗站十分鐘度，好近鳳琴街體育館。外表略有古早味，但服務同價錢同樣時光倒流。店員好友善，真係去咗台灣咁。價錢亦莫名其妙地抵，以為反映質素，點知質素又莫名其妙地高。價廉物美。 ✦ 輕食炸物餐：雙拼蛋餅(肉鬆/芋泥), 配梅甘地瓜薯條，加迷你仙草芋圓。 首先大讚芋泥肉鬆蛋餅，芋泥嘅芋頭味濃郁、口感綿滑，肉鬆量多、咸咸哋吊出個芋香，蛋餅蛋味出、睇得出有煎蛋，真材實料。梅甘地瓜薯條地瓜味非常香濃，加少許梅粉酸酸哋好得意。 仙草芋圓話就迷你，實質都幾大盤，而且好足料，有芋圓、蜜紅豆、水晶、涼粉。芋圓口感煙韌有芋味，水晶q彈，蜜紅豆少甜。唔係hea做，好有心。 ✦ 胡椒豬肚雞腳手工面餐配輕量鹽酥一口雞粒好得意嘅combo。湯底胡椒味濃郁，辣辣哋幾暖胃。雞腳有成三四隻，幾乎皮肉分離，但依然保留住軟骨。豬肚乾淨、新鮮、彈牙。鹽酥雞粒香口，肉感嫩清。 咁樣食法兩個人加埋先百五蚊度，多到食唔晒。原來香港仲有咁高質、咁有心嘅小店，以後多多幫襯。