招牌英國威靈頓牛柳
外層酥皮烤到金黃鬆化，配上野菌蓉同火腿，香氣四溢，輕輕一刀切落去，熱氣同香味即刻爆出來。
牛柳叫咗五成熟，牛肉係粉紅色，色澤均勻，咬落去juicy得嚟又嫩，牛味超濃！配埋酥皮一齊食，食落去仲帶住牛油香，夾埋底層滲出嚟嘅肉汁同醬汁，每啖都係享受，絕對係我食過最好食嘅Wellington！
配菜係意粉，佢哋嘅特製蕃茄汁都係超好食，有濃厚嘅肉味。
深海比目魚配原隻大蝦
比目魚厚肉煎到外脆內嫩，魚味鮮甜，加埋頭大身肥嘅原隻深海大蝦，蝦膏爆滿，一剝開已經聞到濃濃蝦香。
頭盤酥皮湯同羅宋湯都係經典，酥皮湯一撳即碎，入面係白湯，係傳統香港扒房必有嘅味道；羅宋湯酸甜適中，蔬菜都煲到軟腍，而且仲有唔少份量嘅牛肉。牛油餐包外脆內軟，已經有滿滿嘅牛油，真係好香，令人回味。
店員服務親切得似屋企人，坐低食飯氣氛輕鬆。真心覺得係一間值得去嘅懷舊餐廳，下次一定帶屋企人同朋友一齊再來。推介晒俾鍾意正宗香港西餐嘅你哋！
