燒烤堂

營業中

休息中

燒烤堂間間都迫爆人，因為真係食過返尋味！中環安慶大廈呢間同樣食物選擇多，由海鮮到肉類樣樣齊，燒得又夠火候。每台仲有一個細爐方便熱住食物，掛住傾偈都唔怕嘢食凍晒。「味淋魚干竹」一上枱，微甜鮮香即刻入晒口，啖啖都係滿足。「鹽燒翠玉瓜」同「鹽燒秋葵」就簡單鹽燒，清甜脆口，秋葵嗰陣黏滑感真係特別好味。雞肉系列有「三黃雞腿肉」，嫩滑多汁，外皮微焦好香；「鹽燒雞中翼」雞皮脆卜卜，油香爆棚；「兔治雞肉棒」月見汁特別香蛋味，食落有驚喜。「燒羊架」就係肉控最愛，外焦內嫩，羊味濃到飛起。內臟有「爽口雞腎」，彈牙無腥，簡單調味都好夠喉。「厚切牛舌拖羅」係必試，厚切燒到外脆內軟，油脂香到溶晒。「豚肉無花果卷」甜鹹夾擊，無花果同豚肉搭得太好味。海鮮有「浜燒北寄貝」，肥美多汁，鮮味爆棚；「欖角蒜蓉蟶子」蒜香提鮮，啖啖惹味過癮；「鹽燒白鱔」嫩滑得來有咬口，食完想encore。「明太子飯團」外脆內軟，鹹香啱啱好；「芝士年糕」濃郁黏口，烤完芝士香到無法抗拒。叫埋買一送一嘅日本生啤，真係最夾。怕熱氣可以叫杯鹹檸七中和返。食材新鮮，燒功一流，無論鍾意傳統定創意嘢食，都唔會失望。串燒迷一定要試，真係抵讚！