Cuisine Culture

營業中

休息中

朋友介紹原來中環都有樓上店的，這間主打法國菜。店子唔大但就好多食客光顧，佈置簡潔，播放著音樂，坐得幾舒適。美食都幾正宗，價錢合理，仲有推廣餐酒買一送一優惠，約埋三五知己來食都唔錯。焗法式地道古也芝士洋葱湯 $88湯味濃郁，洋葱煮得熟透份外甘甜。芝士溶於湯裡帶來絲絲口感。要趁熱飲否則會覺一點咸，麵包沉浸於湯裡，有湯味之餘也有蒜蓉牛油香，包邊出奇地保留香脆，豐富了口感。蘑菇多士 $98大量蘑菇加上濃稠的忌廉汁，非常美味可口，配上香脆多士，外脆內軟，相當好味。日本鮮帶子檸檬汁初榨橄欖油意粉 $198半熟帶子大粒，味道鮮甜，口感軟彈。意粉煙韌彈牙，配以檸檬汁底清爽酸香，非常開胃。法式地道鴨腿配鴨油煎薯仔 $228鴨皮煎得薄而香脆，肉質鬆軟味道帶咸，伴碟的薯仔亦煎得香口，仲有少量沙律菜平衡一下味覺。朱古力心太軟配雪糕 $88以一幅畫作呈現，欣賞廚師用心。心太軟焗至外脆內軟，一切開濃郁的朱古力溶漿流出，與朱古力雪糕交接，冷熱交融口感滿足。