夏麵館 (寶石大廈) (已結業)

定期都要帶媽咪食吓家鄉上海菜，呢間係香港上海菜裡面少數我地會翻兜嘅，價錢唔貴又接近原地道風味。天氣暖返，最岩食啲涼菜開胃，對眼闊肚窄嘅女士嚟講呢個涼拌五小拼就乜哂；一次過可以試五款，每樣小份又唔怕造成浪費。豬皮水晶凍用上豬腿部分，近乎瘦肉及火腿口感，配合果凍嘅凝膠感，層次豐富，比單食肉來得清爽；雞絲粉皮麻醬足，入口好香花生味，粉皮薄身唔會乸埋一團。海蜇較一般市面粗身，食起嚟更爽口；麻油香重、醋同豉油比例恰到好處，唔會過鹹，好岩我口味。糖醋小排醬汁香甜，夠惹味，但骨頭佔咗七成，中意摞骨嘅會中意啲；烤麩中規中矩，略嫌過油。糖醋魚塊比酒樓好食得多，酸略多於甜，更加醒胃不膩；夠厚肉，炸漿脆而不厚，即使兜醬汁煮都唔會淋哂，唔錯。炸銀絲卷炸得好香口，只係外皮略為煎成焦脆，唔會成舊包索哂油，蘸上煉奶好可口🤤🤤餐廳仲有秋季限定嘅大閘蟹放題，四百幾就有得任食蟹！即叫即蒸，見隔離枱兩夫婦食咗兩三輪（三四十隻），目測隻隻都有三兩半至四兩重，下次嚟一定要試！