牛火火任食火鍋

自己食評前好少可會“提醒”下大家睇評語時有時都諗一諗，係好唔好食好個人，但有時候去到食物係要由你自己處理時，即係好似打甂爐，就算個食材幾好，唔識處理，你就唔好話質素差，好似明知牛脊里，脂肪含量極少，係冇錯佢係嫩滑，就算煎都係建議3成，你打甂爐你預咗淥兩下好食，而唔係唔識處理就話人哋靭到食唔到！

正題：

友人約飯局，約牛火火打甂爐，都聽咗一排依度無限時，水準都唔錯，今次終於一試，今次揀咗壽喜燒湯底，通常任食一嚟大多數都會放低一個肉盤，今日係 牛板腱，牛小排，封門柳，同豬肉，三款牛都不錯，我就喜好脂肪相對較少嘅牛板腱，但如果想牛味濃真心推薦封門柳，我家小牛魔真心推薦。

羊片！愛羊者必必必叫，羊味超濃，如果係一人煲唔好講咁多盡叫，大鍋嘅⋯⋯建議用鴛鴦鍋，食羊者你明白嘅

有叫其他海鮮 ，蝦新鮮嘅雖不至於跳跳紮，但蝦肉紮實無霉，今日有兩款蜆，沙白同灰蜆，兩款都無沙，咬落去爆開有鮮咸味，新鮮魚片好食淥完唔散，蝦滑墨魚滑，比較差一點，雪都未溶。

有驚喜嘅係炸野，乳鴿真係首推🤤🤤🤤，上檯熱焫焫，皮脆肉嫩，炸竹夾魚 又係好味🤤

其他配料：
鴨血 正常 雞子🤢我不喜愛但同檯表示好鮮🤦🏻‍♂️，墨魚仔可以，水蓮可以，丸類正常

雪糕多款選擇，我都食咗四款

今日食牛火火 ，佢嘅質量，招呼都好好，款式繁多真係一次試唔晒。


戴返頭盔先，我覺得好唔好食≠你覺得好唔好食，好唔好食因人而異。