二鍋頭 (嘉芙中心)

營業中

休息中

今日去咗尖沙咀一間叫「二鍋頭」嘅餐廳食晚餐，餐廳主打120分鐘火鍋放題，特別之處係客人可以先任食雞煲、豬手煲、牛尾煲、烤魚同羊腩煲，食完一煲就可以換另一煲，全部嘅份量同味道都唔馬虎，食夠呢五款煲類之後就可以加入湯底去食火鍋，真係食到好飽！🍊 烤魚魚類可以選擇海鱸魚或清江魚，味道可以揀麻辣、香辣、酸辣或醬香，我哋揀咗無咁多魚骨嘅清江魚同醬香味，上菜時香味撲鼻，條魚炸完再放入鍋內加熱，魚肉結實而又冇魚骨，湯底非常惹味，配料有豆皮、西芹同娃娃菜🍊 羊腩煲冬天食羊腩煲就啱晒啦，滋補又暖胃，羊腩炆得非常腍身，脂肪同肉嘅比例均勻，完全吸收晒湯底嘅味道，入面仲有好多配料，包括枝竹、蓮藕、馬蹄、冬菇等，份量好多，食完都已經飽飽地🍊 火鍋湯底我哋加咗個蕃茄薯仔濃湯同胡椒豬肚雞湯做鴛鴦鍋，兩個湯底嘅味道都非常濃郁，用嚟煮蔬菜非常吸味；肉類可以任叫牛板腱、西班牙豬梅肉同紐西蘭羊肉；海鮮類可以任叫活海蜆、吊桶仔、青口、墨魚仔、脆鯇魚腩等；醬料區有蒜蓉、青蔥、炸蒜、辣椒、乾蔥、沙嗲醬、豆瓣醬等醬汁；自助區有各種丸類、餃類、蔬菜、飲品同雪糕，款式種類好多，絕對係性價比之選📍 尖沙咀漆咸道南53-55號嘉芙中心1樓